КЕД СЕМ ІШОВ З КЕРЕШМЕЗУ КУ ПРАДЗЕ

Кед сем ішов з Керешмезу ку Прадзе,
Споткало ся шварне дзевча на дродзе,
Іди, іди, шварне дзевча, додому,
Не заставай ти на дродзе никому.
Іди, іди, шварне дзевча, додому,
Не заставай ти на дродзе никому.

Кед сем ішов з Керештура до Талії,
Бренкали ми подковечки, бренкали.
Лем ти мене, мій коничку, добре нес,
Дам я тебе підкувати єще днес.
Лем ти мене, мій коничку, добре нес,
Дам я тебе підкувати єще днес.

ЇДЯТ КОНІ І П’ЮТ КОНІ

Їдят коні і п’ют коні
З-за новой драбини.
Як же можна не любити
Молодой дівчини.
Як же можна не любити
Молодой дівчини.

Іде козак берегами,
Підковками креше,
За ним, за ним шварне дівча
Черевички несе.
За ним, за ним шварне дівча
Черевички несе.

ІШОВ ЖОВНІР

Ішов жовнір през ліс, през ліщину, (Двічі)
Надибав він молоду дівчину. (Двічі)

Ти, дівчино личка рум’яного, (Двічі)
Переночуй мене молодого. (Двічі)

Я бим тебе переночувала, (Двічі)
Кед би я ся зради не бояла. (Двічі)

Ти, дівчино, не бійся ничого, (Двічі)
Не зрадив я на світі никого. (Двічі)

Ани кінь мій стайні не престоїт, (Двічі)
Ани зброя клинців не поломит. (Двічі)

Спит си жовнір, спит си молоденький. (Двічі)
Пробудився-та юж день біленький. (Двічі)

Ой дівчино, яка ти зрадлива, (Двічі)
Чом ти мене рано не збудила? (Двічі)

Ой за то я тебе не збудила, (Двічі)
Бо я тебе вірні полюбила. (Двічі)

ІДЗЕМ, ІДЗЕМ, АЖ СЯ ТРЄСЕМ

Ідзем, ідзем, аж ся трєсем,
Моїй милій ціжми несем,
Жеби боса не ходила,
Жеби ножки не скаліла.
Жеби боса не ходила,
Жеби ножки не скаліла.

Недалеко верба бучка,
Не піду я за гайдучка,
Бо гайдучок дробно скаче,
Його жена горко плаче.
Бо гайдучок дробно скаче,
Його жена горко плаче.

Мадяр пиє, мадяр скаче,
За мадяром жена плаче,
Плачут дзеці, плаче жена,
Же мадяра дома нема.
Плачут дзеці, плаче жена,
Же мадяра дома нема.

ЕЙ, ЦИСАРЮ, ЦИСАРЮ

Ей, цисарю, цисарю, та нашто нас вербуєш?
Малу маєш країну, та чим нас вигодуєш?

Ей, цисарю, цисарю, планно ти ся веде,
Ей, штонайкращі міста москаль ти забере.

Ей, одобрав Будапешт возьме і Кошиці,
Ей,штонайкращі хлопці то сут в Гамериці.

Ей, цисарю, цисарю, та нашто нас вербуєш?
Ей, малу маєш країну, та чим нас визимуєш?

Ей, не бойтеся ви, хлопці, цісаревого гладу,
Ей, зродилося жито доокола заграду.