ОЙ В ДОЛИНЦІ ШВАРНЕ ДІВЧА

Ой в долинці шварне дівча, в долинці.
Як мі не даш праву ручку — умрем ті.
На, Яничку, на, на, на, бо я твоя дівчина,
Лем не умри, драга душе, до рана.

А як она праву ручку давала,
І так за ньов прегоречно плакала…
Не плач, мила, нє, нє, нє, не нарікай на мене,
Возьму я тя за три роки до себе.

ОЙ БОЖЕ, ЧОГОМ СЯ ДОЧКАВ

Ой Боже, Боже, чогом ся дочкав, (Двічі)
Же я ся так молоденький (Двічі)
До войска достав!

При войску достав коня сивого, (Двічі)
А хто же мі буде вкладав (Двічі)
Сідло на нього?

Ах, прийд мі мила, подай шабличку, (Двічі)
Бо я буду юж ся зберав (Двічі)
На екзецирку.

А екзецирка та нич не значит, (Двічі)
Але тому, хто єй знає, (Двічі)
Стари вояци.

Стари вояци лем спацируют, (Двічі)
А тому рекрутята ім (Двічі)
Гвери пуцуют!

ОЙ БОЖЕ, БОЖЕ, ЯК ДОЩИК СІЄ

Ой Боже, Боже, як дощик сіє. (Двічі)
Як же було не ходити,
Як же було не любити,
Сама ся сміє.

Ой Боже, Боже, яке болото. (Двічі)
Як же було не ходити,
Як же було не любити,
Таке золото.

Ой Боже, Боже, яка курява. (Двічі)
Як же було не ходити,
Як же було не любити,
Сама казала.

ОЙ А СВАШКА Я, СВАШКА

Ой а свашка я, свашка,
Та юж я пресващила,
Ой скоро по весілю,
Ой што буду робила?

Ой ни мі в ступці товчи,
Ой ни мі куділь прясти,
Ей, бо я ся навчила,
Ей, по весілю трясти.

Ой ни мі в ступці товчи,
Ой ни мі молотити.
Ой а Боже мій любий,
Ей, што буду робити?

Ой а мужу мій, мужу,
Ей, а мій прекрасний мужу,
Ой так тя рада виджу,
Ей, а як в заграді ружу.

Ей, бо в заграді ружу,
Ей, сама я садила.
Ой а тебе, мій мужу,
Ей, од Бога м дістала.

ОЙ А ПІД СТАРИМ ДУБОМ

Ой а під старим дубом ой трава зеленіє,
А при недобрім мужі жена ся постаріє.

Ой під молодим дубом трава все зеленіцька,
Ой тай при добрім мужі жена все молодіцька.

Ой Боже мій, Боже мій, ой на мою мамичку,
Ой же ня видавают, ой таку невеличку.