ЗРОДИЛИСЯ ТЕРКИ ЗА ГОРАМИ

Зродилися терки за горами,
Підеме ми на ні з кошиками;
Будеме торгати, будеме ламати
З конарами, з конарами.

Пришов би я до вас каждий вечер,
Жеби сте мі дали, што би я хтів:
Тото дівча шварне, што ма очка чорни,
То би я хтів, то би я хтів.

Пришов би я до вас каждий вечер,
Жеби сте мі дали, што би я хтів:
Не мисочку лену, а шварну Олену,
То би я хтів, то би я хтів.

Пришов би я до вас каждий вечер,
Пред вашими дверми велька мочар,
Прелож, мила, дручки, прейду помалючки,
Каждий вечір, каждий вечір.

Пришла бим я до вас, кед бим сміла,
Жеби сте мі дали, што бим хтіла:
Того шугаїчка, што ма чорни очка,
То бим хтіла, то бим хтіла.

ЕЙ, ЦИ ТО ВАМ, ГУДАЦИ, ЕЙ, СТРУНИ ПОПУКАЛИ

Ей, ци то вам, гудаци, ей, струни попукали,
Ей, жесте юж так давно, ей, в Криници не грали. (Двічі)

Ей, заграйте, гудаци, ей, не жалуйте смика,
Ей, кед я не жалую, ей, свойого язика. (Двічі)

Ей, заграйте, заграйте, ей, гушлі яворови,
Ей, най ся витанцуют, ей, ножки шугайови. (Двічі)

Ей, ножки шугайови, ей, ножки шугаїчки,
Ей, нех ся розвеселят вшитки люде Криницки! (Двічі)

ЕЙ, ФРАЇРОВЕ ШТИРИ

Ей, фраїрове штири, ей, про што сте ся били?
Про тебе, шугайко, ей, бо зме тя любили. (Двічі)
Ей, фраїрове штири, ей, про мня ся не бийте,
Ей, кед ани єден моїм, ей, не буде. (Двічі)

ЕЙ, СПІВАЛА БИМ СОБІ, ШУГАЮ, О ТОБІ

Ей, співала бим собі, шугаю, о тобі,
Ей, але ти, фалечний, позераш по собі.

Фалечний ти шугай, фалечни очи маш,
Ани краплі крови справедливой не маш.

Шугай мальований, не преберай собі,
Жадна кисасоня не піде за тебе.

Ани кисасоня, ани жадна пані,
Не преберай собі, шугай мальований!