Категорія: Різне

— Гуляй, гуляй по боїску
В обтарганім фартушиску!
— На який-єм працовала,
В такім буду танцувала.

Гей же далі по підлозі,
Не завадить ножка нозі,
Ножка нозі не завадить,
Як ї добре попровадить.

Гудачку, грай же мі,
Дівчатко, дай же мі
Солодкой гамбусі,
Не повідж мамусі.

Гори єм перейшов,
Долини не можу.
Фраїречку м найшов —
А жени не можу.

Фраїречку м найшов
Гет на верхнім кінци.
А жени не можу
В цілім Смереківци.

Скарав єс мя, Боже,
Скарав єс мя дуже.
Дав єс мі такого,
Што обручи струже.

Што обручи струже
І пищавки вертит,
Скарав єс мя, Боже,
Аж до самой смерти.

Гудачкове, грайте, паробце, танцюйте,
А ви, стари баби, а ви, стари баби, поза двері стійте. (Двічі)

А стари стояли, з кута попатряли.
Потім разом вишли, в колечко сой стали тай затанцували. (Двічі)

А стари танцуют, ногами цупкают,
Руками заплещут, ґаздів доберают, газдів доберают. (Двічі)

Танцуют, танцуют, аж підлога дуднит.
Голова ся крутит, старий ся не рушит, за руку мя стискат. (Двічі)

А я старий дирда не танцував ниґда,
А тепер я мушу, хоц ся ту задушу, хоц ся ту задушу! (Двічі)

Гудачкове, стійте! Марша нам заграйте,
Бо ми, стари люде, юж більше не будем з вами танцувати!
Юж більше не будем з вами танцувати — підем додом спати!

Знов гудачки грают, паробце танцуют,
Молодих фраїрок файні викручают, файні викручают! Гей, гей! (Двічі)

Грают, бубнуют, а ми іще пиєме!
Мам я фраїречку на другім селечку, добре о ній знам.

Знам о ній, добре знам,
Коли їй ручку дам.
Коваль коня кує, військо машерує
До Тернополя.

З Тернополя до Турки, з Турки до Гамбурка—
Там будем воювать,
Свою кров проливать
За вас, дівчата !

Грают в корчмі, грают, аж корчмичка дуднит, (Двічі)
А моя миленька, моя наймиленьша
Хпала мі, хпала мі до студні.

Ани мі не грайте, ани не бубнуйте, (Двічі)
Лем мі мою милу, мою наймиленьшу
Зо студні, зо студні достаньте.

Юж мі єй достали, юж єй витягнули, (Двічі)
Ани юж не дихат, ани не позерат,
А моє серденько завмерат…