Автор: admin

ОЙ ВЕРШЕ МІЙ, ВЕРШЕ

Ой верше мій, верше, мій зелений верше!
Юж мі так не буде, (Двічі)
Як мі било перше.
Юж мі так не буде, (Двічі)
Як мі било перше.

Бо перше мі било, барз мі добрі било,
Од свойой мамички (Двічі)
Не ходити било.
Од свойой мамички (Двічі)
Не ходити било.

Не ходити било, кади я ходила,
Не любити било, (Двічі)
Кого я любила.
Не любити било, (Двічі)
Кого я любила.

Не ходити било горами-лісами,
Не любити хлопців (Двічі)
З чорними очами.
Не любити хлопців (Двічі)
З чорними очами.

Яничкови очи ходят по убочи,
А мої за нима, (Двічі)
Здали би ся з нима.
А мої за нима, (Двічі)
Здали би ся з нима.

На єдно ся здаме — чорни очка маме,
На друге ся здаме, (Двічі)
Жадне нич не маме.
На друге ся здаме, (Двічі)
Жадне нич не маме.

ОЙ В ДОЛИНЦІ ШВАРНЕ ДІВЧА

Ой в долинці шварне дівча, в долинці.
Як мі не даш праву ручку — умрем ті.
На, Яничку, на, на, на, бо я твоя дівчина,
Лем не умри, драга душе, до рана.

А як она праву ручку давала,
І так за ньов прегоречно плакала…
Не плач, мила, нє, нє, нє, не нарікай на мене,
Возьму я тя за три роки до себе.

ОЙ БОЖЕ, ЧОГОМ СЯ ДОЧКАВ

Ой Боже, Боже, чогом ся дочкав, (Двічі)
Же я ся так молоденький (Двічі)
До войска достав!

При войску достав коня сивого, (Двічі)
А хто же мі буде вкладав (Двічі)
Сідло на нього?

Ах, прийд мі мила, подай шабличку, (Двічі)
Бо я буду юж ся зберав (Двічі)
На екзецирку.

А екзецирка та нич не значит, (Двічі)
Але тому, хто єй знає, (Двічі)
Стари вояци.

Стари вояци лем спацируют, (Двічі)
А тому рекрутята ім (Двічі)
Гвери пуцуют!

ОЙ БОЖЕ, БОЖЕ, ЯК ДОЩИК СІЄ

Ой Боже, Боже, як дощик сіє. (Двічі)
Як же було не ходити,
Як же було не любити,
Сама ся сміє.

Ой Боже, Боже, яке болото. (Двічі)
Як же було не ходити,
Як же було не любити,
Таке золото.

Ой Боже, Боже, яка курява. (Двічі)
Як же було не ходити,
Як же було не любити,
Сама казала.

ОЙ А СВАШКА Я, СВАШКА

Ой а свашка я, свашка,
Та юж я пресващила,
Ой скоро по весілю,
Ой што буду робила?

Ой ни мі в ступці товчи,
Ой ни мі куділь прясти,
Ей, бо я ся навчила,
Ей, по весілю трясти.

Ой ни мі в ступці товчи,
Ой ни мі молотити.
Ой а Боже мій любий,
Ей, што буду робити?

Ой а мужу мій, мужу,
Ей, а мій прекрасний мужу,
Ой так тя рада виджу,
Ей, а як в заграді ружу.

Ей, бо в заграді ружу,
Ей, сама я садила.
Ой а тебе, мій мужу,
Ей, од Бога м дістала.