Категорія: Співанки

Дайте же нам, дайте,
Што нам мате дати.
Бо ми маме куртки, гуньки,
Зимно нам стояти…

А як нам не дате —
То нас погнівате.
Шитки горці потреплеме,
Што на пецу мате!

Дай мі, дівча, дай віночок,
Або хоц квіточок.
Як мі не даш, сам сой зорву
Хоц єден листочок.
Ой не руш мі ти віночка,
Бо він з барвіночка.
З барвіночка зеленого
Зо садочка мого.

Як не хочеш квітка дати,
Мусиш цілувати.
До весіля барз далеко,
Задовго мі ждати.
Я тя буду цілувала,
Кед мі стиснеш ручку,
Як на палец мі заложиш
Золоту обручку.

Дам обручку, як даш ручку,
Або ищи личко,
Бо тя люблю, як шалений,
Хоц сам не знам за што.
Як барз хочеш ти квіточка
Из мого віночка,
Попрос неня, попрос маму,
Тай возмеш мя саму.

Дай же мі, дівчатко, штос мі обіцяло,
Червене яблочко — зелене с мі дало.

Ти мі обіцяло штонайчервеніше,
А ти мі оддало штонайзеленіше.

Яке ся вродило, то таке ти даю,
А як завтра прийдеш, ліпше поглядаю.

Не думай, миленький, же я тя любую,
Бо я собі лем так по кусьцьок жартую.

Не думай, миленька, бо юж по думаню,
Ей, бо юж по нашім вірнім любованю…

— Гуляй, гуляй по боїску
В обтарганім фартушиску!
— На який-єм працовала,
В такім буду танцувала.

Гей же далі по підлозі,
Не завадить ножка нозі,
Ножка нозі не завадить,
Як ї добре попровадить.

Гудачку, грай же мі,
Дівчатко, дай же мі
Солодкой гамбусі,
Не повідж мамусі.

Гори єм перейшов,
Долини не можу.
Фраїречку м найшов —
А жени не можу.

Фраїречку м найшов
Гет на верхнім кінци.
А жени не можу
В цілім Смереківци.

Скарав єс мя, Боже,
Скарав єс мя дуже.
Дав єс мі такого,
Што обручи струже.

Што обручи струже
І пищавки вертит,
Скарав єс мя, Боже,
Аж до самой смерти.