Автор: admin

На зеленій та і луці
Пасло дівча та і уці. (Двічі)

Пришов к ньому пишний дворак:
Ци ти будеш жена моя? (Двічі)

Як я буду жена твоя,
А кед я мам мужа дома? (Двічі)

А што би то учинити,
Чим би мужа отравити? (Двічі)

А йди ти до заградки,
Там накопаш білой м’ятки. (Двічі)

Намоч ти єй до скляночки,
Поставиш єй до світлички. (Двічі)

А як приде твій муж з поля,
Дай му пити, мила моя. (Двічі)

А як пришов єй муж з поля:
Дай мі пити, мила моя. (Двічі)

Подскочила до світлички,
Наточила пів скляночки. (Двічі)

А як він ся того напив,
За серденько ся улапив. (Двічі)

Жено, жено, волай діти,
Бо я иду в землю гнити. (Двічі)

Жена діти заволала,
До дворака лист писала. (Двічі)

Дворак, дворак, пишний дворак,
Юж я буду жена твоя. (Двічі)

Як ти будеш жена моя,
Кед ти мужа отравила? (Двічі)

Отруїлас мужа свого,
Струїш ти мене самого. (Двічі)

На мя бис ся роззлостила,
І мі бис то учинила. (Двічі)

Дворак, дворак, пишний дворак,
Бодай тебе кий покарав! (Двічі)

Як ти мене та овдовів,
Мої діти осиротив! (Двічі)

На заграді черешенька,
Під облачком дві.
Моя мила, премилена, (Двічі)
Що то є тобі?

Я без тебе, мій шугаю,
Ходжу все смутна.
Вечер прийдеш, рано підеш, (Двічі)
Нич не повідаш?

Моя мила захворіла,
Не знам од чого.
Тепер буде повідала (Двічі)
На мя одного.

На кого бим повідала,
Як не на тебе.
Вечер пришов, рано пішов, (Двічі)
Не любиш мене.

Носив єс мі до постелі
Токайске вино.
Аби м дитя не хрестила (Двічі)
На твоє ймено.

Ходит Янчик по заграді,
Файні ґрат, співат.
А Ганічка — при колисці (Двічі)
Плаче, нарікат…