Позначка: Солотвини

МАМ Я КОСУ ОД ТАМТОГО РОЧКУ

Мам я косу од тамтого рочку, (Двічі)
Моя коса добрі косит по самім горбочку.

Мам я косу, мам я косу добру, (Двічі)
Моя коса добрі косит команічку дробну.

Мам я граблі без єдного зубця, (Двічі)
Але я їх добрі продам, бо мам на них купця.

Мам я граблі з шиткима зубцями, (Двічі)
Буду нима сіно грабав тай медже горбами.

ИШОВ ЯНИЧКО В ОГЛЯДИ

Ишов Яничко в огляди (Двічі)
Без материнськой поради. (Двічі)

А як ся мати дознала, (Двічі)
На Чорну гору бігала. (Двічі)

Дрібне коріння копала, (Двічі)
Она Яничка струц мала. (Двічі)

А як ся Янчик то напив, (Двічі)
Зараз за серце ся злапив. (Двічі)

Нич ти, синочку, не буде, (Двічі)
Лем покля сонце не зайде. (Двічі)

Сонце за гору заходит, (Двічі)
З Яничка душа виходит. (Двічі)

З Ганичком идут на воду, (Двічі)
Яничка несут до гробу. (Двічі)

Тераз, мамичко, тераз маш (Двічі)
Заміст весілля погріб враз! (Двічі)