Blog

ЗДАЛЕКА ЗМЕ ПРИЇХАЛИ, ГЕЙ, Я ГЕЙ, Я, ГЕЙ

Здалека зме приїхали, гей, я гей, я, гей!
Коні нам ся залюштали, гей, я гей!
Треба би нам рушничка
Повтирати коничка.

Як єм їхав брез тот хотар, гей, я гей, я гей!
Візок ми ся розтеркотав, гей, я гей!
Збирай мила кулічечка,
Будеш моя фраїречка.

Як єм їхав брез ту воду, гей, я гей, я гей!
Віз єм собі панну млоду, гей, я гей!
Панну млоду і перину,
І пінязей міхурину.

ЗВОНЯТЬ ЗВОНИ, ТРУБЛЯТЬ ТРУБИ (колядка)

Звонять звони, трублять труби, в Вифлеємі новина,
Повертає з Назарету пресвятая родина.
Гей, радуйтеся, люди, мир на земли буде,
Син Божий народився!

Звонять звони, б’ють литаври, всему світу звіщають,
Вже впускає Цар Спаситель грішні душі до раю.
Гей, радуйтеся, люди, мир на земли буде.
Син Божий народився!

ЗАШУМІЛИ ЛІСИ

Зашуміли ліси, зашуміли бори,
Бувайте здорови, (Двічі)
Бувайте здорови, мої рідні гори.

Бувайте здорови, мушу вас лишати,
Їду на чужину, (Двічі)
Їду на чужину хліба заробляти.

Вітер повіває, суха галуз впала,
Юж веселіст моя, (Двічі)
Юж веселіст моя, навіки пропала…

ЗАШУМІЛА ЛІЩИНА

Зашуміла ліщина, ліщина,
Затужила дівчина, дівчина,
Бо єй милий понехав, понехав
Іншу собі пошукав, пошукав.

Моя мила премила, премила
Пораю ти фраїра, фраїра.
Пораю ти кого хцеш, кого хцеш,
Бо ти моя не будеш, не будеш.

Моя мила премила, премила,
Що ти будеш робила, робила.
З ким ти до шлюбу підеш, ба підеш,
Бо ти моя не будеш, не будеш.

ЗАСПІВАЙ, КОГУТКУ

Заспівай, когутку, на вербовім прутку,
Бо моє серденько в барз великім смутку. (Двічі)

Я бим си співала, кобим голос мала,
Аж би мі ся тота гора роздягала. (Двічі)

Співаю, співаю, голосу не маю,
Бо го потратила по зеленім гаю. (Двічі)

Заспівай, пташечку, в зеленім вершечку,
Дост я ся наспівав, як ся лист розвивав. (Двічі)