Автор: admin

Ой так мі ся, гудаче,
Тай танцувати хоче,
Што аж мі ся на танец
Та серденько трепоче.

Ой заграйте, гудаци,
Та на гуслях весело,
Басиста най басує,
Най смичка не жалує.

І весело мі грайте,
Най я сой затанцую,
Та з тим шварним дівчатьом,
Ой што я го любую.

Ой така моя мила,
Ой правда, невеличка,
Але сиві очка ма
Та і червени личка.

Ой гудаченьки, грайте
Тай на гуслях весело.
А же я тя любую, дівча,
Най знає ціле село!

Ой танцую, танцую
І ножки мя не болят,
Бо мі з тобом, миленький,
Легенько ножки ходят.

Такий ти, мій миленький,
Як тот квіток красненький,
А ти, моя миленька,
Як ружа червененька.

Ой я сама не знаю,
Де то ся любост бере,
Же нихто, єй, не оре,
Ой ани, єй, не сіє.

Ой кувала зозуля
Та за хижом в садочку,
Ой вишила мі мила
Та й леняну сорочку.

А як я ся оженю,
То возму собі Ганю,
Бо то дівча робітне,
А й до танцу спритне!

Ой тади, милий, тади,
Ей, попід наши сади,
Ой би тя не виділи,
Ей, тот стари баби.

Ой тади, милий, тади,
Ей, попід наши сливки,
Ой би тя не виділи,
Ей, язикати дівки.

Ой бо як тя увидят,
Ей, матери повідят,
Ой а мати сердита,
Ей, то я буду бита.

Ой сусідко, сусідко,
Пожич мені решітко.
Я ти зараз, я ти зараз принесу,
Лем сой муку протрєсу.
Я ти зараз, я ти зараз принесу,
Лем сой муку протрєсу.

Ой венгерко, венгерко
Пожич же мі люстерко.
Я ти зараз, я ти зараз доручу,
Лем сой вуса підкручу.
Я ти зараз, я ти зараз доручу,
Лем сой вуса підкручу.

Мам я жену молоду,
Не пущу єй по воду.
Могла би ся, могла би ся втопити,
Мусів бим ся женити.
Могла би ся, могла би ся втопити,
Мусів бим ся женити.

Ой дівчино, не вір ми,
Бо я хлопец вандрівний,
Я вандрую, я вандрую туди і там,
Де поверну — дівча мам.
Я вандрую, я вандрую туди і там,
Де поверну — дівча мам.

Ой співаночки мої, (Двічі)
Гей, де ж я вас подію?
Ой у лісі на траві (Двічі)
Гей, там я вас посію.

Ой співаночки мої, (Двічі)
Гей, де ж я вас подію?
Ой у дірі на траві, (Двічі)
Гей, там я вас посію.

Ой будуть дівчатонька, (Двічі)
Гей, по гриби ходити,
Та співаночки мої, та коханочки мої,
Гей, в траві находити.

Ой підуть легіники, (Двічі)
Гей, та траву косити,
Та співаночки мої, (Двічі)
Гей, в траві находити.

Ой співам я си, співам,
В мене такий обичай.
Йа, хлопці так думают,
Же я ся їм залицям.
Йа, хлопці так думают,
Же я ся їм залицям.

Ой піду я до леса
Орішки рвати,
Йа, под же, миленький,
Ліску пригинати.
Йа, под же, миленький,
Ліску пригинати.

А як ти мі єй пригнеш—
То ґамці достанеш.
А як мі горіх розкусиш —
То мя взяти мусиш.
А як мі горіх розкусиш —
То мя взяти мусиш.

Ой співам я си, співам,
В мене такий звичай.
Йа, хлопці так думают,
Же я ся їм залицям.
Йа, хлопці так думают,
Же я ся їм залицям.

Ой співайте, дівчата,
А і ви, хвопчиска.
Йа, а ви, гудачкове,
Ой не жалуйте смичка!
Йа, а ви, гудачкове,
Ой не жалуйте смичка!

Співайте, співайте, гей!
Співайте і грайте,
Йа, наши гороньки,
Ой тай розвеселяйте.
Йа, наши гороньки,
Ой тай розвеселяйте.

Співайте, співайте
Двома голосами,
Жеби рідни лемки, гей,
Чули за морями!
Жеби рідни лемки, гей,
Чули за морями!

Як они почуют, гей,
Рідного співаня,
Йа, то не єдна слеза
Ой буде там виляна.
Йа, то не єдна слеза
Ой буде там виляна.