Автор: admin

МАКОВИЙ ЗАМОЧОК МЕДЖЕ ГОРАМИ

Маковий замочок медже горами (Двічі)
Повідало дівчатко, слюбувало дівчатко, же піде з нами. (Двічі)

Ми по дівча пришли, мац го не дала, (Двічі)
А же оно малючке, а же оно дробнючке, не зна ґаздувац. (Двічі)

Хоц я, мамичко, мала, дробна, (Двічі)
Але я, мамичко, але я, мамичко, ґаздиня добра. (Двічі)

МАВ Я ЖЕНУ ПОГАНУ

Мав я жену, мав я жену погану,
Пропила мі, пропила мі господарку.
Як прийшов я з поля, (Двічі)
Мойой жени нема дома.
Як прийшов я з поля, (Двічі)
Мойой жени нема дома.

Жено моя, жено моя де ти бива ?
Жено моя, жено моя де ти бива ?
У корчмі я мужу, (Двічі)
Вино пива, вино пива.
У корчмі я мужу, (Двічі)
Вино пива, вино пива.

Жено моя, жено моя за штос пива ? (Двічі)
У сусіда, мужу, (Двічі)
Сім таляри пожичива.
У сусіда, мужу, (Двічі)
Сім таляри пожичива.

Жено моя, жено моя хто заплатит? (Двічі)
Продаш, мужу, воли, оддам сусідови,
Оддам гроші сусідови.
Продаш, мужу, воли, оддам сусідови,
Оддам гроші сусідови.

Жено моя, жено моя рад бим бив я,
Якби пришов дакий купец, продав бим тя!
Юж бим тепер іншу, юж бим тепер ліпшу
Жену вибрав, жену вибрав.
Юж бим тепер іншу, юж бим тепер ліпшу
Жену вибрав, жену вибрав.

Не брав бим я, не брав бим я парадниці,
Ни багацкой, ни багацкой розкошниці.
Взяв бим бідну дівчину, (Двічі)
Мав бим добру з ней ґаздиню.
Взяв бим бідну дівчину, (Двічі)
Мав бим добру з ней ґаздиню.

МАВ ЄМ ФРАЇРОЧКУ

Мав єм фраїрочку з другой строни ярку. (Двічі)
Як єм до ней ходив, як єм до ней ходив, повамав єм лавку. (Двічі)

Пищавочка моя о десятох дзюрках (Двічі)
Не хтіва пискати, не хтіва пискати при богатих дівках. (Двічі)

Кед єм си подумав о худобний дівці, (Двічі)
Гнет мі запискава, гнет мі запискава на десятий дзюрці. (Двічі)

ЛЮЛЯЙ, СИНОЧКУ МІЙ (колискова)

Люляй, люляй, синочку мій,
Не буд такий, як отец твій.

Бо твій отец гультаіско,
Пропив в корчмі сорочиско!

Люляй, люляй, синку младий,
Пішов отец на розгади.

Пішов, пішов розгадати,
Чим тя має виховати.

ЛЮЛЯЙ ЖЕ МІ, ЛЮЛЯЙ, КОЛИШУ Я ТЕБЕ (колискова)

Люляй же мі, люляй, колишу я тебе,
А як ти мі заснеш, то я лишу тебе.

Люлю же мі люлю, під зелену дулю,
Дуля ся розвиє і тебе прикриє.

Колисала бим тя і водни і вночи,
Жебим ся по тобі діждала помочи.

Люляй же мі, люляй, Пан-Біг тебе приспит,
Син Божий тя збудит, бо дітину любит.

Колиш же ся, колиш, колисочко сама,
Жебим я си пішла до роботи зрана.

Люляй же ся, люляй, лем ся не скатуляй,
З той новой колиски до чорной землички.

Ой сину, мій сину, я про тебе гину,
Ни во дни, ни вночи- нигда не спочину.

Ой люляй мі, люляй, мій сину молодий,
Як ся постарію, подаш мі хоц води.

Люляй же мі, люляй, моє мале дитя,
Бо я з тобом піду до гаю по квітя.