|
Зелене м посіяв, зелене мі зишло, Богацьке попросив — ани не слухало, І ручку ми дало, і серденько своє, На єдно ся здаме-чорни очка маме, Зелене м посіяв, на сонци дозріват, |
ЖЕБИ ТИ ЗНАВ, ЯНЧИК
Жеби ти знав, Янчик,
Як мя болит пальчик.
Ой навертав бис воли
І згори, і здоли.
Самам навернула,
На траву сой сіла,
Под же ту, миленький,
Штос бим ти повіла.
Повіла бим я ти
Таку новиноньку,
Жебис си поглядав
Іншу фраїроньку.
Жебис си поглядав,
Бо я юж си нашла.
Юж я тя не буду
Оченьками пасла.
Оченьками пасла,
За ручку водила.
Глядай си іншої,
Коль єм ти не мила.
ЖАЛЬНО МІ ТЯ
Жально мі тя, жально, моя мила, жально,
Бо тя не виділи, (Двічі)
Мої очка давно
Світит місяць, світит, зорі помагают,
Іщи мої очка (Двічі)
Кохання не знают.
Не знают, не знают, але будут знати,
Бо я сой шугая (Двічі)
Мушу поглядати.
Світит місяц, світит, і вісем звіздочок,
Барз мі ся подобат (Двічі)
Єден паробочок.
Такий мій миленький медже паробками,
Як ясний місячок (Двічі)
Медже звіздочками.
Такий мій миленький медже паробками,
Як червена ружа (Двічі)
Медже фіялками.
Такий мій миленький, як крапелька роси,
Очка ма сивеньки (Двічі)
Та і чорни власи.
ЕЙ, Я СТАРИЙ
Ей, я старий, я старий,
Та моя брода сива.
Ей, котра за мя піде,
Та буде щаслива!
Ей, я старий схочу встати,
А молода сой поспати.
Ей, а хто хто нам буде
Та газдівку тримати?
Ей, та я рано встану,
Та вшитко ї зрихтую,
А якби завинила —
Я ї подарую.
ЕЙ, ЦІСАРЮ, ЦІСАРЮ
Ей, цісарю, цісарю, планно ти ся веде,
Ей, щонайкращі міста москаль ти одбере.
Ей, одобрав Будапешт, возме і Кошиці,
Ей, щонайкращі хлопці то сут в Америці.
Ей, цісарю, цісарю, нашто нас вербуєш?
Малу маєш країну — чим нас вигодуєш?
Ей, не бійтеся ви, хлопці, цісарського гладу,
Ей, зродилося житко довкола заграду.