Позначка: лемківські пісні

МИЛА МОЯ, ВОЗЬМУ Я ТЯ

Мила моя, возьму я тя,
Кед лем приду з войни до тя.
Прийду з войни, той шаленой,
До свой милой, премиленой.
Прийду з войни, той шаленой,
До свой милой, премиленой.

Мила моя, чекай на мня,
Дрібни листи все пиш до мня.
Дрібни листи написани,
Зо слезами покапани.
Дрібни листи написани,
Зо слезами покапани.

Кед я піду машерувац,
Дам я собі коня кувац.
А за калап возму квітя,
Мила моя, барз люблю тя!
А за калап возму квітя,
Мила моя, барз люблю тя!

МИЛА МОЯ НА КИЧЕРИ СТАЛА

Мила моя на кичери стала,
І на мене смутні позерала.
Мила моя, не позерай смутнє,
Бо мі зараз моє серце лупне!

Мила моя, не слухай никого,
Лем ся тримай розуму свойого.
Хоц бис мала єдно кабатя,
Мила моя, не зохаблю я тя!

МИ, ЦИҐАНЄ, НИЧ НЕ МАМЕ

Ми, циґанє, нич не маме,
Лем гушельки смерекови, тай си граме! (Двічі)

Я сой циґан, што вандрую,
А як піду горі селом, підскакую. (Двічі)

Я сой циган, чорни лиця,
Любит мене циґаночка-красавиця. (Двічі)

Віз заскрипів, пес забрехав,
А до мойой циганочки сват приїхав. (Двічі)

Бо циґани добри люде,
Виховали циґаночку в чорной буде. (Двічі)

Ми, циґанє, нич не маме,
Лем гушельки смерекови, тай все граме! (Двічі)

МИ З КОЛЯДОЮ ПІД ВАШІ СТРІХИ (колядка)

Ми з колядою під ваші стріхи раненько,
Рано, раненько радуйся, серденько,
Син Божий народився!

Ми вам вінчуєм щасно святкувати раненько,
Рано, раненько радуйся, серденько,
Син Божий народився!

Щасно святкувати, Бога вихваляти раненько,
Рано, раненько радуйся, серденько,
Син Божий народився!

Будьте здорові, хто є у хаті раненько,
Рано, раненько радуйся, серденько,
Син Божий народився!

МАТИ МОЯ СТАРА

Мати моя стара, далеко с ня дала,
Дала с мене, молоду, на лихую свекру. (Двічі)

Як вечерю варит, то зо мнов ся сварит,
Як вечерю подає, то до ріки мене шле. (Двічі)

Я по воду пішла та й забарилася,
Як з водою вертала та й наслухалася. (Двічі)

Мати з сином сідит та й радоньку радит:
«Зле ти, сину, сину жиєш, же ти жінки не биєш». (Двічі)

«Мамцю моя стара, не дочекаєшся,
Моя жінка молода, молода, молода
Та й до того хороша, хороша, хороша».