Позначка: лемківські пісні

МАМ Я КОСУ ОД ТАМТОГО РОЧКУ

Мам я косу од тамтого рочку, (Двічі)
Моя коса добрі косит по самім горбочку.

Мам я косу, мам я косу добру, (Двічі)
Моя коса добрі косит команічку дробну.

Мам я граблі без єдного зубця, (Двічі)
Але я їх добрі продам, бо мам на них купця.

Мам я граблі з шиткима зубцями, (Двічі)
Буду нима сіно грабав тай медже горбами.

МАМ КОНИКА ШАРҐУ

Мам коника шарґу і фраїрку гарду,
Добрий коник шарґа і фраїрка гарда. (Двічі)

Конику сивавий, вивезь мя з мурави,
Як мя не вивезеш — стрілю ти до глави. (Двічі)

Коничок сивавий вивюз го з мурави,
Чекай мене, дівча, для милой розмови. (Двічі)

Козак приїжджає, дівчину питає,
Чи вона його вірні, вірненько кохає. (Двічі)

МАЛИ ДІТИ МАТІР

Мали діти матір, (Двічі)
То била мачоха. (Двічі)

Вивела їх она (Двічі)
Стерню оганяти. (Двічі)

Діточки поснули, (Двічі)
Стерню не огнали. (Двічі)

Взяла она собі (Двічі)
Два прути тернови. (Двічі)

Так она їх била, (Двічі)
Прути поламала! (Двічі)

Пішли они, пішли (Двічі)
На свой мами гробик. (Двічі)

Ой а хто то там, хто (Двічі)
По мой гробі ходит? (Двічі)

Ой ми, матусю, ми, (Двічі)
Пусте нас ку собі! (Двічі)

А идте ви, идте (Двічі)
До свой мачошиці (Двічі)

Най вам їсти дає (Двічі)
І приодіває. (Двічі)

Як она нас миє, (Двічі)
Поза карк нас биє, (Двічі)

Як она нас чеше, (Двічі)
З голови кров тече. (Двічі)

Своїм дитяточкам (Двічі)
Шнурочки купує. (Двічі)

А нам, сирітонькам, (Двічі)
Ниточки жалує. (Двічі)

Своїм дитятонькам (Двічі)
Калачики пече. (Двічі)

А нам, сирітонькам, (Двічі)
З отрубів загнете. (Двічі)

Зіслав Пан-Біг, зіслав (Двічі)
Двох шатанів з пекла. (Двічі)

Взяли мачошицю, (Двічі)
Пішли з ньом до пекла. (Двічі)

Кеби я ся могла (Двічі)
На сей світ достати, (Двічі)

Знала би я, знала, (Двічі)
Як сиротам платиц. (Двічі)

МАЛАМ Я ФРАЇРА ФУЯРОША

Малам я фраїра фуяроша,
Што робив фуярки до вароша.
На фуярце ду-ду, ду-ду,
Малам я фраїра, юж не буду.

Біла ружа преквитала насиняво,
А они мя шварну дівку потішали.
Най понехат, най прібує.
За малий, кроткий час побанує.

МАЛАМ СОЙ МИЛОГО ФУЯРОША

Малам сой милого фуяроша,
Што робив фуярки до вароша.
На фуярце ду-ду, ду-ду,
Малам я милого, юж не буду.
На фуярце ду-ду, ду-ду,
Малам я милого, юж не буду.

Малам сой милого годинаря,
Што робив годинки для цісаря.
Як зачала година биц,
Малам сой милого, юж не мам нич.
Як зачала година биц,
Малам сой милого, юж не мам нич.

Малам сой милого коминаря,
Скочив мі з коника до Дуная,
Лапайте го, тримайте го,
Знайдете драпачку ведле него!
Лапайте го, тримайте го,
Знайдете драпачку ведле него!