Позначка: лемківські пісні

МАЛА Я ФРАЇРА ГОДИНАРЯ

Мала я фраїра годинаря,
Што робив годинки для цісаря.
Як зачала година биц,
Мала я фраїра, юж не мам нич.
Як зачала година биц,
Мала я фраїра, юж не мам нич.

Мала я фраїра гребеняра,
Што робив гребені для цісаря.
Тоти гребені добрі чешут,
Висівски парібки вшитки брешут.
Тоти гребені добрі чешут,
Висівски парібки вшитки брешут.

МАЛА МАТИ СИНА, ТАЙ ГО ОЖЕНИЛА

Мала мати сина,
Тай го оженила,
Гей, молоду невістку (Двічі)
Дуже не любила.

Виправила сина
В далеку дорогу,
Гей, молоду невістку (Двічі)
До поля, до льону.

Як вибереш льону,
То прийдеш додому.
Як не вибереш льону, (Двічі)
Не прийдеш додому.

Брала она, брала,
В поли ночувала.
Гей, і на своїм поли (Двічі)
Топольом зостала.

Приїхав синочок
З далекой дороги
І питається неньки: (Двічі)
Де моя миленька?

Возми ти, синочку,
Остру сокирочку,
Ид вирубай тополю, (Двічі)
Што на нашім полю.

Зарубав він єй раз —
Она не почула,
Гей, зарубав другий раз, (Двічі)
Она прогварила:

Не рубай ня, мужу,
Не рубай ня дуже,
Гей, бо я не тополя, (Двічі)
Лише твоя доля.

Бодай твоїй мамі
Так легко сконати,
Гей, што нас молоденьких (Двічі)
З пари розганяти.

МАКОВИЙ ЗАМОЧОК МЕДЖЕ ГОРАМИ

Маковий замочок медже горами (Двічі)
Повідало дівчатко, слюбувало дівчатко, же піде з нами. (Двічі)

Ми по дівча пришли, мац го не дала, (Двічі)
А же оно малючке, а же оно дробнючке, не зна ґаздувац. (Двічі)

Хоц я, мамичко, мала, дробна, (Двічі)
Але я, мамичко, але я, мамичко, ґаздиня добра. (Двічі)

МАВ Я ЖЕНУ ПОГАНУ

Мав я жену, мав я жену погану,
Пропила мі, пропила мі господарку.
Як прийшов я з поля, (Двічі)
Мойой жени нема дома.
Як прийшов я з поля, (Двічі)
Мойой жени нема дома.

Жено моя, жено моя де ти бива ?
Жено моя, жено моя де ти бива ?
У корчмі я мужу, (Двічі)
Вино пива, вино пива.
У корчмі я мужу, (Двічі)
Вино пива, вино пива.

Жено моя, жено моя за штос пива ? (Двічі)
У сусіда, мужу, (Двічі)
Сім таляри пожичива.
У сусіда, мужу, (Двічі)
Сім таляри пожичива.

Жено моя, жено моя хто заплатит? (Двічі)
Продаш, мужу, воли, оддам сусідови,
Оддам гроші сусідови.
Продаш, мужу, воли, оддам сусідови,
Оддам гроші сусідови.

Жено моя, жено моя рад бим бив я,
Якби пришов дакий купец, продав бим тя!
Юж бим тепер іншу, юж бим тепер ліпшу
Жену вибрав, жену вибрав.
Юж бим тепер іншу, юж бим тепер ліпшу
Жену вибрав, жену вибрав.

Не брав бим я, не брав бим я парадниці,
Ни багацкой, ни багацкой розкошниці.
Взяв бим бідну дівчину, (Двічі)
Мав бим добру з ней ґаздиню.
Взяв бим бідну дівчину, (Двічі)
Мав бим добру з ней ґаздиню.

МАВ ЄМ ФРАЇРОЧКУ

Мав єм фраїрочку з другой строни ярку. (Двічі)
Як єм до ней ходив, як єм до ней ходив, повамав єм лавку. (Двічі)

Пищавочка моя о десятох дзюрках (Двічі)
Не хтіва пискати, не хтіва пискати при богатих дівках. (Двічі)

Кед єм си подумав о худобний дівці, (Двічі)
Гнет мі запискава, гнет мі запискава на десятий дзюрці. (Двічі)